Milli Məclisin ötən gün keçirilən plenar iclasında “Azərbaycan Respublikasının Vergi Məcəlləsində dəyişiklik edilməsi haqqında” qanun layihəsi III oxunuşda qəbul edilib.

Trend Dövlət Vergi Xidmətinə istinadən xəbər verir ki, investisiya mühitinin və sahibkarlıq fəaliyyətinin təşviqi və sahibkarlıq subyektlərinin vergi yükünün azaldılması istiqamətində Vergi Məcəlləsinə mühüm dəyişikliklərdən biri də əcnəbilərə və vətəndaşlığı olmayan şəxslərə göstərilən tibbi xidmətlərə görə tax-free rejimində ƏDV-nin geri qaytarılması ilə bağlıdır.

Məlumata görə, dəyişikliyə əsasən, əcnəbilərə və vətəndaşlığı olmayan şəxslərə göstərilən tibbi xidmətlərə görə nağdsız qaydada aparılan ödənişlər üzrə ödənilmiş ƏDV-nin tam məbləğdə həmin şəxslərə geri qaytarılması nəzərdə tutulur.

Qeyd olunub ki, bu dəyişiklik ölkədə tibb turizminin inkişafı və ölkəyə valyuta cəlb olunmasının stimullaşdırılması məqsədi daşıyır.