Kişineu, 14 aprel, AZƏRTAC
Moldova kütləvi informasiya vasitələrində Azərbaycan Ordusunun əsgərinə ermənilər tərəfindən işgəncələrin verilməsi və onunla qəddar rəftar olunmasına dair məqalələr dərc edilib.
AZƏRTAC xəbər verir ki, “Noi”, “Timpul” və digər xəbər portallarında yayılan məqalələrdə azərbaycanlı əsgərə qarşı ağır işgəncələrin verilməsini 1949-cu il 12 avqust tarixli Cenevrə konvensiyalarının kobud şəkildə pozulması faktı kimi qiymətləndirilib.
“Noi” portalında dərc olunan məqalədə Azərbaycanın insan hüquqlari üzrə müvəkkili (ombudsman) Səbinə Əliyevanın Ermənistanda saxlanılan hərbçilərimizə qarşı işgəncə və qeyri-insani rəftar faktına münasibət bildirilib. Aidiyyəti beynəlxalq təşkilatlar bu faktlara münasibət bildirməyə və Ermənistanı beynəlxalq hüquq normalarına uyğun olaraq tələblərə əməl etməyə çağırılıb.
“Timpul” saytında isə Avropa İttifaqının Azərbaycan nümayəndəliyinin rəhbəri Peter Mixalkonun və Azərbaycan Xarici İşlər Nazirliyinin hadisəni pisləyən açıqlamalarına yer verilib.
