NATO-nun sözçüsü Fərəh Daxlallah Qazaxıstanın Aktau şəhərində baş vermiş faciəvi təyyarə qəzası ilə əlaqədar başsağlığı verib.
Trend xəbər verir ki, bu barədə o, “X” sosial şəbəkə hesabında paylaşım edib.
“Düşüncələrimiz və dualarımız AZAL aviaşirkətinə məxsus J28243 reysinin qəzaya uğraması nəticəsində həlak olanların və yaralananların ailələri ilədir. Zərərçəkənlərin tezliklə sağalmasını arzulayır və faciənin səbəblərinin ətraflı araşdırılmasına çağırırıq”, – paylaşımda bildirilir.
Qeyd edək ki, ötən gün Bakı-Qroznı marşrutu üzrə uçan "Embraer 190" sərnişin təyyarəsi Aktaunun hava limanından 3 km məsafədə qəzaya uğrayıb.
Aktau şəhərində qəzaya uğrayan Bakı-Qroznı reysini yerinə yetirən “Embraer 190” təyyarəsində 62 sərnişin, 5 ekipaj üzvü olmaqla, ümumilikdə 67 nəfər olub.
Qəzadan sonra xəstəxanaya 27 şəxs daxil olub. Onlardan 15 nəfər Azərbaycan Respublikasının, 8 nəfər Rusiya Federasiyasının, 3 nəfər Qırğızıstan Respublikasının vətəndaşıdır. Bir nəfərin şəxsiyyəti, hələlik müəyyən edilməyib.
Xəstəxanaya daxil olmuş şəxslərdən 11-i reanimasiya şöbəsində, 13-ü travmatologiya şöbəsində, 2-si neyrocərrahiyyə şöbəsində, 1-i isə cərrahiyyə şöbəsində müalicə alır. Həmin şəxslər Azərbaycan, Qazaxıstan və Rusiyadan ezam olunmuş peşəkar həkimlərin nəzarəti altındadır.