Bakı, 3 aprel, AZƏRTAC

Finlandiya aprelin 4-də NATO ölkələri xarici işlər nazirlərinin Brüsseldə keçiriləcək iclasında rəsmən alyansın 31-ci üzvü olacaq.

DHA Press xəbər verir ki, bu barədə NATO-nun Baş katibi Yens Stoltenberq Şimali Atlantika Bloku ölkələrinin xarici işlər nazirlərinin 4-5 aprel tarixlərində keçiriləcək iclası ərəfəsində Brüsseldə mətbuat konfransında deyib.

“Bu, tarixi həftədir. Sabah Finlandiyanı NATO-nun 31-ci üzvü kimi salamlayacağıq. Finlandiya təhlükəsiz, alyansımız isə güclü olacaq. Sabahdan etibarən Finlandiya NATO-nun tamhüquqlu üzvünə çevriləcək”, - deyə Yens Stoltenberq vurğulayıb.

Finlandiya Prezidenti ofisi də öz növbəsində ölkənin aprelin 4-də alyansa üzv olacağı barədə yayılan məlumatı təsdiqləyib. Ofisdən bildirilib ki, Finlandiya Prezidenti Sauli Niinistyö alyansa yeni üzvün qəbul olunması ilə əlaqədar NATO-nun mənzil-qərargahında keçiriləcək rəsmi tədbirdə iştirak etmək üçün Brüsselə gedəcək.