30 ildir həsrətini çəkdiyim doğma yurdum - Cəbrayıla qayıdışdan böyük arzu ola bilməz.

Bunu Trend-ə açıqlamasında Cəbrayıl sakini İsayev Məhəmmədəli deyib.

Onun sözlərinə görə, ötən 30 ildə hər gecə yuxusunda Cəbrayılı görür və hər gün bu günü gəlib-çatmasını gözləyib.

"Allah şəhidlərimizə rəhmət eləsin, qazilərimizə cansağlığı versin.

Allah Prezidentimizi, dövlətimizi, xalqımızı qorusun.

Mən bu gündən artıq sevincli gün tanımıram. Həyatımda bu günü sözlə ifadə edə bilmirəm. O torpaqları gördükdən sonra artıq arzum yoxdur", - deyə o qeyd edib.

Qeyd edək ki, hazırda Qarabağda və Şərqi Zəngəzurda, ora köçürülən keçmiş məcburi köçkünlərlə yanaşı, bu bölgədə aparılan layihələrin icrasında çalışan, həmçinin ayrı-ayrı dövlət qurumlarının yerli bölmələrində xidməti vəzifələrini yerinə yetirən, yenidən fəaliyyətə başlamış səhiyyə, təhsil, mədəniyyət, turizm, sənaye, energetika müəssisələrində işləyən, ümumilikdə, 30 mindən çox insan yaşayır.